inosen兮台華語有聲BLOG
關於部落格
多謝你來看,歡迎多多宣傳本部落格喔!本部落格建議使用Firefox來看,一寡字體才走會出來!
  • 45935

    累積人氣

  • 0

    今日人氣

    0

    訂閱人氣

(台)台語延續兮危機佮契機

2005.8.10 我昨暗(zang-am)gah我以前佇(di)高中教冊兮時兮學生開講,伊問我為啥麼(ui-sia-mih)堅持愛(ai)講台語,閣卜(bheh)寫台語文,按呢看起來真奇怪。我講一句話:著( diorh)是想卜gah我做儂(lang)兮尊嚴找轉來,這是上界(siong-gai)重要兮原因。至少佇咧語言即(zit)部份,我心內一直有互(ho)儂殖民兮悲哀,咱兮父母話(以前攏翻譯做母語,m-gu我認為iah是用父母話較好)除了1949年以後來台灣兮新移民(一般講做是外省人),主要攏是台語文,包括客話,hoklor話,原住民兮話。 我兮父母話著是hoklor話,我毋是(m-si)講其他兮話毋是台語,我兮BLOG受著我家己兮語言限制,所以主要是用hoklor話(以前有儂講是閩南語),這是無啥毋對兮代誌。雖然講台語是ui閩南語演變來兮,毋拘(m-gu)傳到台灣後,慢慢仔演變,受著無仝所在兮移民)兮影響,所以已經透濫,而且嘛(ma)受著原住民(主要是平埔族)發音gah字詞兮影響,iah閣有後來兮日本統治,位(ui)日文遐(hia)吸收真濟字詞,即點嘛gah以前兮閩南語無仝,雖然講福建佮(gap)台灣在彼當時(hit dong-si)攏是受著日本兮影響,毋拘台灣是直接受著日本兮統治,接受兮字詞是閣較直接,ma閣較全面,。這ma是佮福建無仝兮所在。而且受著國民黨殖民幾十年(gui-zap-ni),所以咱兮台語佮閩南語佇咧字詞等ma是有所差別。 本底台語是真好兮語言,但是受著殖民統治百冬,害咱對著台語suah來看無。有真濟儂講,台語只要有儂講著好,ma有儂講台語無字,所以無需要ma無可能來寫台語文,我彼兮學生對我講,雖然老師你兮理想真好,但是我認為台語以後會(e)愈(lu)來lu少儂講,我講若是lu無儂講,即ma(zit-ma)若無教囝仔講,無將現代白話台語文文字化,著會失去台語延續(ian-siok)兮契機。 首先,咱對所謂台語無漢字兮誤解觀點來講,以漢民族兮語言來講,佇現代進前,除了文言文有書面標準以外,其他各地兮語言兮白話文,哪有標準文字化兮? 即ma兮華語白話文字,ma是民國了後zia開始標準化兮,因為當時台灣毋是中國兮領土,所以無參與即場以華語白話文為中心兮標準化運動,漢民族當中唯一除了華語以外,家己開創新兮文字系統,著只有廣東話爾爾(nia-nia),因為香港無受著中國兮統治,英國儂ma無阻擋in用廣東話,而且講廣東話兮儂當中有真濟文人真愛看粵劇,甚至替in寫劇本,所以開創in兮書寫系統。即ma,香港電影(無應該叫做國片,應該叫做港片)基本上攏用廣東話發音,而且ma會當用廣東話寫。台語在日本儂兮統治下,日本儂無希望咱講台語,ma阻擋任何台語文文字化兮努力,以前有蔡培火希望會當公開教白話字(著是用羅馬字寫台語,ma會當算是文字化兮一種努力)。日本儂講會妨害in日語兮推動,所以毋准。而且台灣兮漢學兮傳統真強,而且以台語兮戲劇來講,歌仔戲是受著知識份子兮看袂起,著閣較mai講啥物寫劇本囉,清朝著真流行兮歌仔冊兮選字ma毋是真頂真,漢字ma真歹學,而且,知識份子直接著會當用日文寫作,所以ma互台語白話文字化兮需求減少真濟。台灣儂是真現實兮民族,無合意(gah-i)深思,只要是會當馬上teh著手來用著好,所以有日語zia-ni方便接收新知兮工具,對台語文兮推動著袂傷過積極,ma是因為無彼個資本通gah日本儂對抗,台灣兮知識份子真濟是地主等出身,而且咱台灣ui清朝開始,漢人兮開發是各自進行,所以山頭主義ma真強,想bheh愛in有統一兮想法來互台語文字化,ma是真困難,而且是互日本zia-ni專制兮政府統治,哪有可能推動咱台語兮文字化。 佇戰後,咱猶閣受著國民黨兮統治,一開始,in兮主要敵人是日文,所以無真嚴格限制咱講台語,一直到國民黨逃到台灣了後,而且是佇咧in兮國際地位開始保袂稠(diau)兮時陣,開始嚴格推行in兮國語文運動,無准咱講咱兮父母話,所以咱少年一輩suah有真濟儂無法度講流利兮台語,一句話ma講袂好勢。Gah咱兮父母iah閣有阿公阿媽彼輩ma有代溝,這是我所感覺著兮台灣儂兮悲哀。 即ma,閣較害,我觀察著兮現象,是連阿公阿媽,嘛無想bheh gah孫講台語,若無著是孫講華語,阿媽講台語,爸媽著閣kah毋免講,全部講華語,講啥物這是為著囝仔好,因為唯一兮標準文字是華語,所以規氣mai教in講台語,橫直(huai-dit)阮ma講袂好,囝仔ma袂曉,囝仔袂曉著愛教伊講zia對,哪會顛倒互伊教?這是真奇怪,所以有真濟囝仔想講講台語兮儂是無讀冊兮儂zia deh講兮話,因為逐家攏無deh講,ma無合意講,而且除了鄉土語言以外,學校ma無教,鄉土語言即個名實在是蹧躂儂,敢講我住di台北著袂當講台語?而且鄉土語言ma毋是專門兮老師,毋是正式兮編制,隨時攏有可能互儂廢除,只要逐家認為這無重要,著隨時通好廢除。這代表咱台灣ma是仝款是di殖民統治,di咧中華民國兮統治之下,所以除了所謂兮國語以外,攏是鄉土語言,攏總有一工愛消失,所以當有儂講bheh語言平等法兮時,著有真濟儂反對,因為in是華語霸權兮受益者,in無想bheh互講其他語言兮儂in兮平等人權—語言權,講這無可能,毋是講愛廢除華語做一個通行語,只是bheh互其他語言一個發展兮空間,這種要求ma受著打壓。台灣儂若是無覺醒,著會閣一擺漢化,第一擺是清朝兮時,漢移民兮漢化,第二擺著是國民黨帶來兮華語漢化。 另外有儂講台語有儂講著好,這好參像是gah台語當做是受保護動物有一兩隻著好,這著是教育部對鄉土語言兮態度,會曉講幾句著好,對我來講,這這是華語至上兮對台語兮施捨(si-sia),這是一種主人對奴隸兮施捨,即種施捨,我甘願mai。所以我講想bheh找轉來我做儂兮尊嚴,著是即個意思。儂攏是平等兮,毋管伊講啥物語言攏應該有平等兮權利,而且是咱家己兮父母話。有兮儂會講,若是按呢,客人咧,原住民咧,我ma bheh企(kia)di咧儂兮立場講:加油,咱同齊為咱家己兮父母話延續拍拼。 我即ma是想bheh講互有想bheh教你兮囝兒序細台語兮儂聽,咱ai在日常生活中著gah in 講台語,按呢zia會當互in自然學會曉講台語,著算講故事冊是用華語寫兮,ma會當盡量用台語翻譯互in聽,di咧in去學校了後,咱愛di咧食暗頓兮時,gap in 講台語,分享一工兮心得,這是上重要兮學習演講兮時間。di咧外口兮時,若是拄著(du-diorh)儂,攏會當先用台語gah咱問好,若是對方會曉講台語,著愛gap伊講台語,若是袂曉zia講華語。毋免驚囝仔袂曉講華語,因為dileh學校,主要攏是華語,而且卡通節目攏差不多是用華語發音,若是di咧現在情形無改變之下,咱若是無用按呢兮方法,台語zia會真正消失。 另外,應該愛組成一個團體,著是互囝仔之間有用台語交流兮機會,這ma是真重要兮社會化過程,互in知影除了厝內兮儂,ma有外口兮儂會曉講台語。 Cun兮我後擺zia寫。大家會當參考家庭母語資源中心兮建議:http://iug.csie.dahan.edu.tw/TG/MTFamily/MTFamily.htm

相簿設定
標籤設定
相簿狀態